الميزانية|Budget

 

اليوم حابه اتكلم عن شيء ضروري لكل انسان او فرد وصولاً للاسرة ثم العائلة ثم المجتمع.

يمكن الاغلب يستحي يتكلم فيه حتى مايوصف بالوصف الشنيع في مجتمعاتنا العربيه( بخيل)  وفي فرق بين الوعي المالي والبخل او يعتبر من العادات المنعدمه الي بشكل او اخر احنا اسهمنا في انعدامها ربما بقصد او من دون قصد من خلال عدم الكلام فيها والتفاخر بالاسراف والتصوير لمجرد انه عندي الماركه الفلانيه وانه ماانطبق المثل مد لحافك على قد رجليك.

الحقيقه انه الي بيعملوا كل هذي الامور هي الطبقه الوسطى من المجتمع وهي الغالبه عندنا في السعوديه واظن اغلب المجتمعات الخليجيه والعربيه وليس الغنيه الي نقول انه من مقدورهم هذي الامور وبكذا معروف النتيجه الضغط على نفس والاهل بالمصاريف الي مانقدر عليها والي مانحتاجها وديون ومشاكل اجتماعيه واسريه والسبب ابغى اسوي زي المشهور/ه الفلاني/ه واحنا مانعرف انه نص اشيائهم مجانيه اعلان او مانعرف هم من اي طبقه وكم دخلهم.

لازم نحاول نتشبع بمفهوم الميزانية والادخار وناخذها سستم لحياتنا وعاده ونعلم اطفالنا عليها من نعومة اظفارهم ولازم تتناقش في كل بيت مو عيب انه تقول او تقولين مااقدر ميزانيتي ماتسمح🤚🏻

العيب انه رغم المبلغ الي عندي ووضعي الي اعرف انه متوسط او حتى فقير اروح اصرف فلوسي في اشياء فوق طاقتي ولا هي من احتياجي ورفاهيه والضروريات اصير احرج نفسي واتصل او ارسل لفلان وعلان سلفني ديني واراكم الدين على ظهري.

اذا الدول والشركات ماتمشي الا بميزانية فما بالكم بالفرد او الاسرة. 

اول خطوه: 

*نحدد كم ديونا او ممكن مانسميها ديون ممكن استلفت مبلغ من شخص ولازم ارجعه له اين كان هذا الشخص حتى لو امي واحاول اجمع المبلغ او اسدده على فترات.( الدين حق من حقوق الشخص الي استلفت منه ولا يسقط فلا نتسينه او تتناسين ترجعيه له لانه مايجوز)

*تحديد الضروريات الشهريه الي احتاجها.

(ضرورة يعني مااقدر اكمل الشهر من دونها)

*تحديد الكماليات الي ابغى اشتريها مثلاً جوال لاب توب آي باد جهاز للبشره للشعر...الخ و تحديد مبلغ ثابت كل شهر اجمعه عشان في نهاية مثلاً 3اشهر اشتري هذي الحاجه الي نفسي فيها مو اصرف فلوس الشهر كامل عليها واعيش 30يوم على الحديده واذا مااحتجتي المبلغ يكون موجود للطوارئ.

*تحديد مبلغ ولو قليل صدقه ومبلغ اجمعه ادخاااار وانساه ولا المسه.

ثاني خطوه:

*اسوي جرد لاشيائي من ملابس اكسسوارات جزم (اكرمكم الله) وشنط( المستهلكات) اشوف الي ناقصني بكل مصداقيه مع نفسي واكتبه في لسته والي ينفع يطلع صدقه ونظيف وجديد بس زهقت منه او ماناسبني ولا استخدمه اطلعه صدقه والاشياء الي تنرمي ارميها واشتري الي احتاجه فقط مو هوس شراء.

*مكياج ومنتجات العنايه بالبشره اشتري على حسب ميزانيتي كم تسمح وفي ماركات معروفه وموثوقه مو مثلاً تقليد ماركه هاي اند بس مضر وكله مواد رصاص وكرتزون بس عشان منسوخ عليه شعار الماركه في ماركات درق ستور وعريقه ومشهوره على قد الطبقه المتوسطه زي مثلاً (اسنس-ميبيلين-ماكس فاكتور-ريميل لوندن-...الخ) والعنايه(نيفيا-بيزلين-نيتروجينا-جونسون-...الخ) كلها ماركات معروفه ومتوسطة السعر وغير مضره.

*برضه الاجهزه من جوال ولاب توب مو يكون عندي ايفون اكس جديد ماله سنه وعشان نزل

ايفون 11اروح اشتريه اقل قيقا ب5000ريال معليش آسفه بس هذا غباء مالي.

*عندي مناسبه اخصص لها مبلغ اجمعه كل شهر قبلها بكم شهر بذات لو كبيره ولو عاجله ولاكنت ادري عنها الا وقتها استخدم مبلغ الطوارئ.

*قللي روحات مطاعم اسواق كوفيهات لمرتين في الشهر مو كل يوم ومرتين روحي تمشي مثلاً في اماكن طبيعيه او سوي باربكيو ومن هذي الحركات كذا غطينا رحلات الوكيند 4رحلات في الشهر وزيدي حسب طبيعتك واسرتك.

*لاتروحي ابو ريالين او خمسه من دون حاجه راح تستهينين في المبلغ وتخرجين دافعه الف ريال على الفاضي واشياء ماتحتاجينها.

ثالث خطوه: 

* لو جمعتي مبلغ حلو  من الادخار اياكِ اياكِ تصرفينه في اشياء تقليد او مستهلكات لو قليل اشتري اما ذهب او ساعه ماركه معروفه مو تقليد درجه اولى لا شيء مجوهرات  تبقى وتنفعك لاحقاً لو احتجتي لاقدر الله او علاج بشره او ليزر لو احتااجه فقط مو رفاهيه لو كثير استثمري فيه بأي حاجه تحبيها.

*لاتقصرين على نفسسسك او اطفالك او اسرتك ابداً لانه لو قصرنا نعتبر في هذه اللحظه بخيلين في شعره بين البخل والتوفير .

رابع خطوه: 

القناعه كنز لايفنا مهما كان دخلك ومصدره من طالبه مدرسه او جامعه الى ربة منزل الى عاطله الى موظفه الى صاحبة بزنس او مشروع سواء كان مصروف او مكافأه او راتب او حافز اصرفي على قده تجنبي الدين قدر المستطاع خططي ورتبي شيء نفسي فيه وغالي على ميزانيتي مو شرط اشتريه في نفس اللحظه ممكن اجمع له ممكن بعدها يقل حماسي له لانه مو ضروري اوقف الهدر والتسوق العشوائي من المواقع والتطبيقات والتخفيضات في المتاجر على ارض الواقع لااازم جزء ادخار مهما كان دخلي ان شاء الله كان 500ريال اقتطع 50ادخار كل شهر.
.
.
.
(يمكنكم ان تتركوا لي تجاربكم في التعليقات)

دمتم بصحه وجمال...💕

***********************

***********************