ألف باء نظافة شخصية|personal cleanliness

أعرف انه موضوع جداً حساس ومحرج عند البعض رغم انه اجباري على الانسان يكون نظيف ومهتم بهندامه ورائحته وواجب علينا كمسلمين دينياً وواجب علينا اجتماعياً في مجتمعنا ومع ذلك لسى نشوف ناس ماتهتم بنفسها وتأذي  نفسها وغيرها بعدم النظافة الشخصية.

((شعاري في هذا الموضوع لا حياء في الدين))

ممكن يكون السبب هو جهل بالمشكله او صغر سن ( فئة المراهقين  من سنه خامس ابتدائي الى الثانويه دئماً في تجمعاتهم نلاحظ المشكله هذي بذات في المدارس)  كلامي مع هذي الفئة بذات ومع العموم والي حابين يستفيدون عموماً ماصار في عذر أمي ماقالت لي أمي ماعلمتني بمجرد الدخول على اي متصفح والبحث عن اساسيات النظافة تعرفي كل شيء الان وفي هذا الوقت كل حاجه تبغين تعرفينها ابحثي عنها المعلومه متاحه للجميع👍🏻

همسه للامهات هذا العذر مايلغي دورك في تعليم بنتك او ابنك النظافة الشخصية من نعومة اظفارهم من قبل السن هذا والتأكيد عليها في سن المراهقه حتى تتكون عاده وماتعرضيهم للحرج من شخص غريب ينصحهم او النفور والتنمر لي يتعرضون له اذا ماتعلموا هذي الاساسيات في البيت بذات ان مجتمع المراهقين غير مبالي وممكن يعطون في الوجه فأرجوك لاتعرضين اطفالك لهذي المشاعر🙏🏻

راح نقسم النظافة لاربعة مراحل:(شعر،وجه،جسم،الملابس والرائحه)

الشعر:

مهم جداً جداً العنايه بنظافة الشعر وغسله بشكل دوري وعدد مرات الغسل تختلف فالدهني مثلا ً اربع مرات والجاف مرتين في الاسبوع بشامبو مخصص لنوعية الشعر نفسها وتعطيره بتولات الزيوت او الخمريات او البخور الانه الفروه اذا ماتعطرت لها رئحه غير مستحبه وكثير ناس يهملوا هذي النقطه يكونون مهندمين واخر نظافه وشياكه لما تمر ريحة فروة رأسها سئيه بعضهم تطنش هذي النقطه على اساس التعطر يطلع شيب وهذي معلومه 100%خطاء وسألوا الناس الفاهمه من اطباء الجلديه برضه ركزوا على عدم استخدام امشاط وفرش اشخاص اخرين مهما كان لانه عن طريقها ممكن تنتقل الامراض الجلديه الي تجي بالفروه او حتى الحشرات واركز على ذي النقطه اذكر في المدرسه كنت اشوف بنات يمشطوا بنفس المشط كلهم وهذا غلط.

الوجه:

يشمل الوجه ككل وبرضه العيون والانف والفم والاذان نبدأ

*بالوجه والعيون غسله كل يوم مهم جداً بعد الاستيقاظ مباشره وقبل النوم برضه مرتين يومياً بغسول مخصص لنوع بشرتك وترطيبه لانه الجفاف برضه منظره مش مستحب وركزي على تنظيف العين والرموش بالماء.

*الانف لااااازم لاززم تهتمي بنظافته اشوف بنات كبار بعمر ال11سنه وفوق ولا هي مهتمه بنظافة انفها.

*الاذان لازم كل فتره تنظفي الاذن الخارجيه بمناديل مبلله او قطن بس من دون ماتدخلينها داخل الاذن بس تنظفي الافرازات الشمعيه اللي خرجة من الاذن لانه منظرها مقزز.

*الفم  والاسنان اساسي انه تفرشي اسنانك من مرتين لثلاثه مرات في اليوم اول مره قبل النوم وثاني مره فور الاستيقاظ بمعجون رائحته جميله وبرضه اللسان راح تستغربون بس ايوه اللسان في اغلب البكتيريا وبرضه مضمضه بغسول اسنان منعش واستخدام اللبان والحلوى بالروائح المنعشه  الي هي نعناع مو فواكه دئماً ويتكثف الموضوع في حالة اكل طعام في روائح نفاثه زي البصل والثوم  قال ﷺ: (مَنْ أَكَلَ الثُّومَ أَوِ البَصَلَ مِنَ الجُوعِ أَوْ غَيْرِهِ فَلاَ يَقْرَبَنَّ مَسْجِدَنَا).

الجسم:

الشور اليوم مهم كل يوم خذي شور سريع بأي غسول جسم او صابونه تفضلينها وركزي على اماكن التعرق في الغسل+رطبي جسمك بمرطب عميق افضل يكون الشور بعد المجهود الي بذلتيه سواء بعد العوده من المدرسه او الجامعه او الدوام او ممارسه الرياضه او الطبخ او تنظيف البيت مو قبل النوم ولا بعد الاستيقاظ الانه الجسم وقتها نظيف ولا تعرض للتعرق برضه ازالة الشعر الغير مرغوب فيه وهنا 👈🏻موضوع عن وسائل ازالة الشعر وعيوبها ومميزاتها اطلعي عليه +تغيير الملابس الداخليه بشكل يومي +قص الاظافر كل اسبوع مره +استخدام مزيل رائح التعرق ولا تغفلين هذي النقطه ابداً ابداً مااحد يشم نفسه بس الناس تشم وتتأذى ومزيل الرائحه لا يسبب سرطان ولا يسود استخدمه من 13سنه ولا شفت خرافات الناس عنه.

الملابس والرائحه:

اهتمي بأن ملابسك تكون نظيفه ومكويه لا فيها بقع ولارائحه شميها قبل تلبسينها ومجرد ماتخلصي منها حطيها في سلة الغسيل واغسليها واكويها للاستخدام القادم طبعاً كلامي عن الملابس الخارجيه بذات الي تداومي فيها من مريول او يونيفورم خلي عندك على الاقل غيارين لو كان لكم زي إلزامي واغسليهم بستمرار وعطريهم وبخريهم (اذا كان عملك غير مختلط نساء فقط واذا مختلط لا تعطري ولا تبخري بس اغسليهم لانه مايجوز رجل غريب يشم عطرك)والملابس الداخليه تتغير يوميات من مره لمرتين في اليوم ملابس البيت تتغير برضه وخصوصاً بعد الطبخ والتنظيف.

الرائحه او التعطير تبدأ من الاستحمام ومزيل رائحة العرق الي 💯ضروره صيف وشتاء وخرافة يسود يسرطن سويلها ديليت ورائحة الفم نهاية بالعطر الي ترشينه فوق ملابسك.

👌🏻الانطباع الاول عند اي شخصه عنك بيكون غالباً حكم على نظافتك ورائحتك وهندامك وبشاشتك فحافظي عليهم في احسن صوره واحرصي عليهم الكلام مو بس للبنات الكلام ينطبق  على كلا الجنسين والافضل الاهالي يعلموا اطفالهم من هم بيبي حتى مايتعبوا في حياتهم او يسببوا الضيق لاحد سواء بنت او ولد اهمال النظافه كارثه بحق الشخص وبحق محيطه.

.

.

.

(يمكنكم ان تتركوا لي تجاربكم في التعليقات)

دمتم بصحه وجمال....💕

***********************

***********************